Saturday, 1 November 2014

ಡೈರಿ - ಪುಟ ೬೫


                         "ನನ್ನ ಕ್ಲಾಸ್ ಮೇಟ್ಸ್ ತುಂಬಾ ಜನ ಕೇಳ್ತಾ ಇರ್ತಾರೆ. ನಿನ್ನ ರೂಮ್ ಮೇಟ್ ಯಾಕೆ ಇಂಗ್ಲಿಷಿನಲ್ಲಿ ಬರ್ಯೋದಿಲ್ಲಾ ಅಂತ." ನಮ್ಮ ರೂಮ್ ಮೇಟ್ ಮಹಾರಾಣಿ ಹೇಳಿದ್ದನ್ನು ಕೇಳಿ ಬಗ್ಗಿ ನ್ಯೂಸ್ ಪೇಪರ್ ಓದುತ್ತಿದ್ದ ನಾನು ತಲೆ ಎತ್ತಿದೆ.
                          "ಓಹ್, ನಾನ್ಯಾಕೆ ಇಂಗ್ಲಿಷಿನಲ್ಲಿ ಬರೆಯಬೇಕಂತೆ..??" ನಾನು ಪ್ರಶ್ನೆ ಹಾಕಿದೆ.
                          "ಇಂಗ್ಲಿಷಿನಲ್ಲಿ ಬರೆದರೆ ತುಂಬಾ ಜನ ಓದ್ತಾರಲ್ವಾ..?? ಅವ್ರಿಗೆಲ್ಲಾ ಕನ್ನಡ ಅಷ್ಟು ಚೆನ್ನಾಗಿ ಓದ್ಲಿಕ್ಕೆ ಬರಲ್ಲ."
                          "ಅವ್ರೆಲ್ಲರೂ ಕರ್ನಾಟಕದವ್ರೇ ತಾನೇ..?? ಇಲ್ಲೇ ಹುಟ್ಟಿ ಇಲ್ಲೇ ವಾಸ ಮಾಡ್ತಾ ಇರೋರಲ್ವಾ..?? ಮತ್ಯಾಕೆ ಕನ್ನಡ ಚೆನ್ನಾಗಿ ಬರಲ್ಲ..?? ಬರಲ್ಲ ಅಂತಿದ್ರೆ ಕಲೀಲಿ ಬಿಡು. ಅವ್ರ ಸಲುವಾಗಿ ನಾನು ಕನ್ನಡ ಬಿಟ್ಟು ಇಂಗ್ಲಿಷಿನಲ್ಲಿ ಬರೆಯಲಾ..??"
                           "ಹಾಗಲ್ಲ ಮಾರಾಯ್ತಿ. ಇವತ್ತಿನ ದಿನ ಇಂಗ್ಲಿಷನ್ನು ಚೆನ್ನಾಗಿ ಕಲಿಯಲೇಬೇಕಲ್ವಾ..?? ಈಗೇನೋ ಕನ್ನಡನಾಡಿನಲ್ಲೇ ಇದೀವಿ. ಕರ್ನಾಟಕದ ಹೊರಗೆಲ್ಲಾದ್ರೂ ಜೀವನ ಮಾಡ್ಬೇಕಾಗಿ ಬಂದ್ರೆ..?? ಆಗ ಅಲ್ಲಿ ನಿನ್ನ ಬರಹಗಳನ್ನು ಕನ್ನಡದಲ್ಲಿ ಬರದ್ರೆ ಎಷ್ಟು ಜನ ತಾನೇ ಓದ್ತಾರೆ..??"
                            "ಅಮ್ಮಾ ತಾಯಿ ನಾನು ಎಲ್ಲೇ ಇರಲಿ, ಬರ್ಯೋದು ಮಾತ್ರ ಕನ್ನಡದಲ್ಲೇ. ಕನ್ನಡ ಓದ್ಬೇಕು ಅನ್ನೋ ಕನ್ನಡ ಪ್ರೀತಿಯಿರೋ ಮಂದಿ ಓದ್ತಾರೆ ಬಿಡು. ಮಾತೃಭಾಷೆ ಮಾತ್ರವೇ ಭಾವನೆಗಳಿಗೆ, ಯೋಚನೆಗಳಿಗೆ ಸೂಕ್ತ ಭಾಷೆಯಾಗಬಲ್ಲದು. ಇಂಗ್ಲಿಷಿಗೇನಿದ್ರೂ ವ್ಯಾವಹಾರಿಕ ಭಾಷೆಯ ಸ್ಥಾನ ಅಷ್ಟೆ. ಒಂದು ಮಾತಿದೆ ಗೊತ್ತಾ..?? ಮಾತೃಭಾಷೆಯಲ್ಲಿ ಪರಿಣಿತಿ ಇದ್ದರೆ ಬೇರೆ ಯಾವ ಭಾಷೆಗಳನ್ನಾದರೂ ಸುಲಭವಾಗಿ ಕಲಿಯಬಹುದು ಅಂತಾ. ನಂಗೆ ಕನ್ನಡಾನೇ ನೆಟ್ಟಗೆ ಬರಲ್ಲ. ಇಂಗ್ಲಿಷ್ ಅಷ್ಟಕ್ಕಷ್ಟೆ. ಅಂಥಾದ್ರಲ್ಲಿ ಕನ್ನಡ ಬಿಟ್ಟು ಇಂಗ್ಲಿಷಿನಲ್ಲಿ ಬರೀತ ಕೂತ್ರೆ ಆ ಕಡೆ ಇಂಗ್ಲಿಷ್ ಒಲಿಯೋದಿಲ್ಲ, ಈ ಕಡೆ ಕನ್ನಡ ಬೆಳೆಯೋದಿಲ್ಲ. ನಂಗಂತೂ ಕನ್ನಡದಲ್ಲಿ ಅಲ್ಪ ಸ್ವಲ್ಪ ಗೀಚಲಿಕ್ಕೆ ಬರುತ್ತೆ ಅಂತಾ ಭಾಳನೇ ಖುಷಿಯಿದೆ. ನಿನ್ನ ಕ್ಲಾಸ್ ಮೇಟ್ಸ್ ಗೆ ಹೀಗೆ ಹೇಳ್ಬಿಡು."
                            "ಅಯ್ಯೋ ಆಯ್ತು ಕಣೇ. ಅಡ್ಡಬಿದ್ದೆ ನಿಂಗೆ" ಅವಳು ಕೈ ಜೋಡಿಸುತ್ತಾ ನಾಟಕೀಯವಾಗಿ ಹೇಳಿದಳು.


2 comments:

  1. ಸಿರಿಗನ್ನಡದ ಜ್ಯೋತಿ ಸದಾ ಬೆಳಗಲಿ. ನಿಮ್ಮ ಯೋಚನಾ"ಲಹರಿ" ಎಲ್ಲರಲ್ಲೂ ಮೂಡಲಿ.

    ReplyDelete
  2. ಸಿರಿಗನ್ನಡದ ಜ್ಯೋತಿ ಸದಾ ಬೆಳಗಲಿ. ನಿಮ್ಮ ಯೋಚನಾ"ಲಹರಿ" ಎಲ್ಲರಲ್ಲೂ ಮೂಡಲಿ.

    ReplyDelete