Thursday, 4 September 2014

ಗುರುಭ್ಯೋ ನಮಃ


ಅಜ್ಞಾನದ ಕತ್ತಲಿನ ಕೂಪದಿಂದ
ಸುಜ್ಞಾನದ ಬೆಳಕಿನ ಬಾನಿನೆಡೆಗೆ
‘ಶಿ’ಷ್ಟಾಚಾರದ ಮೂರ್ತರೂಪವೇ ತಾನಾಗಿ
‘ಕ್ಷ’ಯ ಭೋಗ, ಅಕ್ಷಯ ತ್ಯಾಗದೊಂದಿಗೆ
‘ಕ’ನ್ನಡಿಯ ಬಿಂಬದಂತೆ ನುಡಿಯುವ, ನಡೆಯುವ
ಉನ್ನತ ವ್ಯಕ್ತಿತ್ವವೇ ಶಿಕ್ಷಕ
ಅದರ ಉತ್ಕೃಷ್ಟ ಸ್ಥಾನವೇ ಗುರು

ನಾಲ್ಕು ಗೋಡೆಗಳ ಬಾಗಿಲ ಹೊರಗೂ
ಗದ್ಯ ಪದ್ಯಗಳ ಪರಿಧಿಯಾಚೆಗೂ
ಭಾವ ಬುದ್ಧಿಗಳ ಬೇಲಿಯನ್ನು ದಾಟಿ
ಎಲ್ಲ ತತ್ವಗಳ ಎಲ್ಲೆಯನ್ನು ಮೀರಿ
ವಿದ್ಯಾರ್ಜನೆಯ ಬಯಸಿ ಬಂದ ಜೀವಕೆ
ತನ್ನ ಜೀವನವನ್ನೇ ಆಹುತಿಯಾಗಿಸುವವ

ನಿನ್ನೆಗಳ ನೆರಳಿನ ಬೆಳಕಿನಲ್ಲಿ
ಉತ್ತಮ ನಾಳೆಗಳಿಗೆ ಅಡಿಪಾಯ ಹಾಕುವ
ಮೂರ್ತಿಗೊಂದು ಆಕೃತಿ ನೀಡುವ ಜನಕ
ಶಿಷ್ಯರ ಯಶಸ್ಸಿನ ತೆರೆಯಲ್ಲಿ ನಿಂತು
ತನ್ನ ಜನ್ಮದ ಸಾರ್ಥಕತೆಯ ಪಡೆವ
ಎಲ್ಲ ಗುರುಗಳ ಪಾದ ಚರಣಕ್ಕೆ ನಮನ
ಶ್ರೀ ಗುರುಭ್ಯೋ ನಮಃ


3 comments:

  1. nijakkoo tumba sundarvada kavite. prati saalu arthapoornavagide. bahala dinagala mele ondu uttama kavite odidahagaytu.nimage dhanyavadagalu.

    prabhakar tamragouri
    writer , GOKARNA

    ReplyDelete