Sunday, 17 August 2014

ಹರೇ ಕೃಷ್ಣ


ಅಲ್ಲಿ ನೋಡು ಗೋಪಿ, ಕಳ್ಳ ಕೃಷ್ಣನನ್ನು
ಓಡುತಿಹನವ ಬೆಣ್ಣೆ ಕದ್ದು ತಿನ್ನುತಲಿ
ಕೇಳಿದರೆ ಅಡ್ಡಡ್ಡ ಕತ್ತು ಹೊರಳಿಸುವನು
ಗದ್ದವೂ ಬೆಳ್ಳಗಾಗಿರುವುದು ಕಾಣಿಸದೇ..??
ಅದೆಷ್ಟು ಬಾರಿ ದೂರೊಯ್ಯಲಿ ಯಶೋದೆಗೆ..??
ಗೋಪಾಲನ ತುಂಟತನವು ಅತಿಯಾಯಿತಮ್ಮ

ಮೋಹನನ ಮುರಳಿ ಅದೆಷ್ಟು ಮಧುರವೇ
ಬೆಳದಿಂಗಳ ಚಂದಿರನೂ ಮನಸೋತಿಹನಂತೆ
ಕೊಳಲ ಗಾನಕೆ ತಲೆದೂಗುತ ಮೈ ಮರೆತು
ಒಮ್ಮೆ ಯಮುನೆಯೂ ಹರಿವುದ ನಿಲ್ಲಿಸಿದೆ
ಬೃಂದಾವನ ಬಗೆಬಗೆಯ ಬಣ್ಣ ತಳೆದು
ಮೋಹಕತೆಯ ಮಳೆಯಲ್ಲಿ ಮಿಂದಿದ್ದಿದೆ

ವಾಸುದೇವನ ಗುಣವೆಂಥದು ಗೆಳತಿ
ದುಷ್ಟ ಕಂಸನ ಕೊಂದು ಶಿಷ್ಟರನು ರಕ್ಷಿಸಿದ
ಸರ್ವರಿಗೂ ಅಭಯಹಸ್ತವನಿತ್ತು ಹರಸಿದ
ದೇವಕಿಯ ಕಣ್ಣೊರೆಸಿ ವಸುದೇವನ ಕಾಲಿಗೆರಗಿದ
ಮಥುರಾ ನಗರಿಗೆ ಮೆರುಗನು ತಂದ
ಮನೆ ಮಗನಂತಾದ ಮನಸಿನಲ್ಲಿ ನಿಂತ

ಗೋಪಿಕೆಯರ ಸೀರೆಯನು ಕದ್ದೊಯ್ದರೂ
ಸೋದರಿ ದ್ರೌಪದಿಯ ಮಾನ ಉಳಿಸಿದವನಾತ
ಸಂಧಾನಕೆ ಸ್ವತಃ ಮುಂದಾಗಿ ಹೋದರೂ
ಪಾರ್ಥನಿಗೆ ಯುದ್ಧಮಾಡೆಂದು ಬೋಧಿಸಿದ
ಸ್ನೇಹಕ್ಕೆ ಜೈ ಸಮರಕ್ಕೆ ಸೈ ಎಂದ ಶ್ಯಾಮ
ಗೀತೆಯ ಬೆಳಕಿನಿಂದ ಅಜ್ಞಾನವ ಓಡಿಸಿದ

ಶ್ರೀಕೃಷ್ಣನ ಕುರಿತಾಗಿ ಹೇಳಿ ತೀರುವುದೆಂತು
ಆತನ ಮಹಿಮೆಗೆ ಸಾಟಿ ಬೇರಿನ್ನಾವುದಿಹುದು..??
ಹರಿಯ ನಾಮ ಸ್ಮರಣೆಯೇ ಆತ್ಮಕೆ ಅಮೃತ
ನಡೆ-ನುಡಿಗಳೇ ನರನಾಡಿಗಳಿಗೆ ವೇದಾಂತ
ಅಷ್ಟಮಿಯ ಶುಭದಿನವು ಮಂಗಳ ತರಲಿ
ಮನತುಂಬಿ ಹೇಳಿರೊಮ್ಮೆ ಹರೇ ಕೃಷ್ಣ


1 comment: