Friday, 22 August 2014

ಡೈರಿ ಪುಟ - ೫೭


                                "ಹ್ವಾಯ್, ಎಂತಾ ಮಾರಾಯ್ತಿ ಬೆಳಿಗ್ಗೆ ಏಳೂವರೆಗೆ ಹಾಸ್ಟೆಲ್ ಬಿಟ್ಟವಳು ಈಗ ಬರ್ತಾ ಇದೀಯಾ..?? ನಾನೇನೋ ನೀನು ಇವತ್ತು ಕಾಲೇಜು ವಾಸ್ತವ್ಯ ಮಾಡ್ತೀಯೇನೋ ಅಂದ್ಕೊಂಡಿದ್ದೆ. ಇವತ್ತೇನು ಅಂಥಾ ವಿಶೇಷವಿತ್ತು..??" ಉಸ್ಸಪ್ಪಾ ಎನ್ನುತ್ತ ರೂಮು ಪ್ರವೇಶಿಸಿ ತನ್ನ ಮಂಚದ ಮೇಲೆ ದೊಪ್ಪನೆ ಕುಸಿದು ಕುಳಿತ ರೂಮ್ ಮೇಟ್ ಅನ್ನು ಕೇಳಿದೆ.
                                "ನಿಂಗೆ ತಲೆಹರಟೆ. ಇವತ್ತು ಇದ್ದಿದ್ದು ಮೂರೇ ಕ್ಲಾಸಾಗಿತ್ತು ಕಣೇ. ಅದೂ ಕೂಡ ಎರಡು ಕ್ಲಾಸುಗಳ ಮಧ್ಯೆ ಎರಡು ತಾಸು ಬಿಡುವಿತ್ತು. ಲಾಸ್ಟ್ ಕ್ಲಾಸ್ ಅಲ್ಲಿ ಸರ್ ಹೇಳ್ಬೇಕಾ ಈಗ ೪.೪೫ಕ್ಕೆ ಲ್ಯಾಬ್ ಇದೆ ನಿಮಗೆ ಅಂತಾ. ಕ್ಲಾಸು ೨.೧೫ಗೆ ಮುಗೀತು. ಅಲ್ಲಿ ತನಕ ಕಾದು ಕೂರೋದಾ ಅಂತಾ ನಾವೆಲ್ಲಾ ಸರ್ ಗೆ ಈಗಲೇ ತಗೊಳ್ಳಿ ಅಂದ್ರೆ ಅವರೇನಂದ್ರು ಗೊತ್ತಾ..?? "ನೋ ಲ್ಯಾಬ್ಸ್ ಆರ್ ಫ್ರೀ ನೌ". ಹಾಗಾಗಿ ಬರೋಬ್ಬರಿ ಎರಡೂವರೆ ತಾಸು ವ್ಯರ್ಥ ಸಮಯ ಕಳೀತು ನೋಡು. ಅಲ್ಲಾ, ಕಾಲೇಜಿನವರಿಗೆ ಅಷ್ಟು ತಿಳಿಯುವುದಿಲ್ಲವಾ..?? ವಿದ್ಯಾರ್ಥಿಗಳ ಸಮಯ ಎಂದರೆ ಅಷ್ಟು ಹಗುರವಾಗೇಕೆ ಭಾವಿಸುತ್ತಾರೋ..?? ಕೇವಲ ಮೂರು ಕ್ಲಾಸುಗಳ ಸಲುವಾಗಿ ಇಡೀ ದಿನ ಕಾಲೇಜಿನಲ್ಲಿರಬೇಕಪಾ. ಫುಲ್ ಸುಸ್ತಾಗಿದೆ ಕಣೇ. ನಾಳೆ ಬೇರೆ ಮತ್ತೆ ಎಂಟಕ್ಕೆ ಕ್ಲಾಸು. ಓಹ್ ಮೈ ದ್ಯಾವ್ರೇ." ಅವಳು ಸಿಟ್ಟು, ಬೇಸರ ಎಲ್ಲವನ್ನೂ ಒಟ್ಟುಗೂಡಿಸಿ ಮಾತನಾಡಿದಳು.
                                   "ವಿದ್ಯಾರ್ಥಿಗಳ ಸಮಯದ ಬಗ್ಗೆ ಅಷ್ಟೆಲ್ಲಾ ಕಾಳಜಿ ಇದ್ದಿದ್ದರೆ ಎಂಜಿನಿಯರಿಂಗ್ ನಾಲ್ಕು ವರ್ಷಗಳದ್ದಾಗಿರುತ್ತಿರಲಿಲ್ಲ. ಮತ್ತೆ ಕಾಲೇಜಿನವರಿಗೆ ಪ್ರತಿಯೊಬ್ಬರ ಸಮಯವೂ ಅಮೂಲ್ಯವಾದದ್ದು ಎಂಬ ವಿವೇಚನೆ ಇದ್ದಿದ್ದರೆ ಕಥೆಯೇ ಬೇರೆಯಾಗಿರುತ್ತಿತ್ತು ಬಿಡು. ಕ್ಲಾಸು, ಕ್ಯಾಂಪಸ್ಸುಗಳಲ್ಲಿ ಸಮಯ ಕಳೆದಿರೋದಕ್ಕಿಂತಲೂ ಕ್ಲಾಸುಗಳಿಗಾಗಿ, ಲೆಕ್ಚರರ್ಸ್ ಸಲುವಾಗಿ ಕಾದಿದ್ದೇ ಹೆಚ್ಚು. ಇದು ನಮ್ಮ ಕಾಲೇಜಿನಲ್ಲಿ ಮಾತ್ರವಲ್ಲ, ಎಲ್ಲಾ ಕಡೆಯ ಹಣೆಬರಹ. ನಮ್ಮ ಜೀವನದಲ್ಲಿ ಬಹಳ ದುಬಾರಿ ಆಸ್ತಿಯೆಂದರೆ ಸಮಯ. ಅದೂ ಬೇರೆಯವರ ವಿಷಯದಲ್ಲೂ ಹೌದು. ನಮ್ಮ ಕಾಲವನ್ನು ನಾವಾಗೇ ಖರ್ಚು ಮಾಡುವಾಗಲೂ, ಬೇರೆಯವರಿಗಾಗಿ ವ್ಯಯಿಸುವಾಗಲೂ ಇದನ್ನು ನೆನಪಿನಲ್ಲಿಟ್ಟುಕೊಳ್ಳಬೇಕು. ಅಷ್ಟೇ ಅಲ್ಲ, ಮತ್ತೊಬ್ಬರ ಸಮಯದ ಕುರಿತಾಗಿಯೂ ಗೌರವದಿಂದ ವರ್ತಿಸಬೇಕು. ಈ ಪ್ರಬುದ್ಧತೆ ಇಪ್ಪತ್ತು ವರ್ಷದ ನಂತರವಾದರೂ ಬರಬೇಕಪ್ಪ. ಆದರೆ ಐದು ಬೆರಳುಗಳೂ ಒಂದೇ ಸಮನಾಗಿರುವುದಿಲ್ಲ ಅಲ್ಲವಾ..??"
                                 "ಈ ವಾರ ಪೂರ್ತಿ ಹೀಗೆ ಆಗಿದೆ ಕಣೇ. ಬರೇ ಟೈಮ್ ವೇಸ್ಟ್. ಅದರಿಂದಾಗಿ ಎಷ್ಟೆಲ್ಲಾ ಕೆಲಸಗಳು ಬಾಕಿ ಉಳಿದುಕೊಂಡಿವೆ ಗೊತ್ತಾ..?? ಛೇ."
                                  "ಮಾರಾಯ್ತಿ, ಹಳೆಯದರ ಕುರಿತು ಯಾಕೆ ಯೋಚಿಸುತ್ತೀಯಾ..?? ಈಗ ಮತ್ತೆ ಮೂಡ್ ಆಫ್ ಮಾಡಿಕೊಂಡರೆ ಈಗಿನ ಸಮಯವೂ ವ್ಯರ್ಥವಾಗುವುದಷ್ಟೆ. ಮೊದಲು ಫ್ರೆಶ್ ಆಗು ಹೋಗು."


2 comments:

  1. ಖರೆ ಮಾತು ಹೇಳಿದ್ರಿ ನೋಡಿ .

    ReplyDelete
  2. ಖರೆ ಮಾತು ಹೇಳಿದ್ರಿ ನೋಡಿ .

    ReplyDelete