Friday, 22 August 2014

ಹಕ್ಕಿ ಹಾರುತಿದೆ



ಆಗಸಕ್ಕೆ ಹತ್ತಿರವಾಗುತ್ತ
ಉತ್ತರದಲ್ಲಿ ಎತ್ತರ ಎತ್ತರಕ್ಕೆ
ಹಕ್ಕಿ ಹಾರುತಿದೆ, ಹಾಡುತಲಿ
ರೆಕ್ಕೆಗಳನ್ನು ಪಟಪಟವೆನಿಸುತಿದೆ
ಕಣ್ಣು ಹೊರಳಿಸುತ್ತ ಕಿವಿ ನಿಮಿರಿಸುತ್ತ
ಕತ್ತು ಬಾಗಿಸದೇ ಕುತ್ತು ಬರದಂತೆ
ತಲೆ ಎತ್ತರಿಸಿ ತಾನವಾಗಿ ಹಾರುತಿದೆ

ಅತ್ತ ಇತ್ತ ಎಂಬ ಸುತ್ತಲಿಲ್ಲದೇ
ಗುರಿ ಗಡಿಗಳೆಂಬ ಚಿತ್ತವಿಲ್ಲದೇ
ಹಾರುತಿದೆ ಕೇವಲ ಹಾರುತಿದೆ
ಗುಡ್ಡ ಬೆಟ್ಟಗಳಿರಲಿ, ಬಯಲೇ ಬರಲಿ
ನದಿ ತೊರೆಗಳೆಂಬ ತಂಪು ಸಿಗಲಿ
ಮರುಭೂಮಿಯ ಮರಳ ಕೆಂಪಿನಲ್ಲೂ
ಊರು ಕೇರಿಗಳ ಇರುವಿನೊಂದಿಗೂ

ತತ್ವ ಶಾಸ್ತ್ರಗಳ ಶಸ್ತ್ರ ಧರಿಸದೆ
ಜಾತಿ ಧರ್ಮಗಳ ಮತಿಯ ಮರೆತು
ದೇಹವನ್ನೇ ದಾರಿಯಾಗಿಸಿಕೊಂಡಿದೆ
ಭಾವ ಬುದ್ಧಿಗಳ ಬಂಧವನ್ನು ಬಿಟ್ಟು
ಮನಸೆಂಬ ಮನೆಯನ್ನು ತೊರೆದು
ಆತ್ಮವನ್ನೇ ಆಹುತಿಯನ್ನಾಗಿಸಿದೆ
ಮುಕ್ತವಾಗಿ ತಪ್ತವಾಗಿ ಹಾರುತಿದೆ

ಹಕ್ಕಿ ಶಾಂತವಾಗಿ ಹಾರುತಿದೆ
ಭೂಮಿ ಬಾನುಗಳ ಬೇಲಿಯನ್ನು ದಾಟಿ
ಎಲ್ಲ ನಿಲುವುಗಳ ಎಲ್ಲೆ ಮೇರಿ
ನನ್ನನ್ನು ನಿನ್ನನ್ನು ನಿವಾಳಿಸಿ
ನಮ್ಮವರನ್ನೆಲ್ಲಾ ಒಟ್ಟಾಗಿ ಕೂಡಿಸುತ್ತ
ತನ್ನಿಂದ ತಾನು ದೂರ ಸಾಗುತಿದೆ
ಹಾರುತಿದೆ ಕೇವಲ ಹಾರುತಿದೆ


1 comment: