Sunday, 10 August 2014

ಮಳೆ ನಿಂತು ಹೋದ ಮೇಲೆ


ಮಳೆಯೆಂದೋ ಮೂಕವಾಗಿ ಮಾಯವಾಗಿದೆ
ಕರಿಮೋಡಗಳೂ ಕರಗಿ ಚದುರಿವೆ
ತಿಳಿಯಾಗಿದ್ದರೂ ಅದೇಕೋ ಹುಳಿಯಾಗುವಂತೆ
ಅಲ್ಲಲ್ಲಿ ಹನಿಗಳು ಮತ್ತೆ ಹೆಪ್ಪುಗಟ್ಟುತಲಿ
ಅಳಿದ ಪರದೆಯ ಮೇಲೆ ಅರಳುವಂತಿದೆ
ಮಸುಕಾದ ಚಿತ್ರಗಳು ಮನದ ಮೂಸೆಯಲ್ಲಿ

ಒಳಗೆ ಹೊದ್ದು ಮಲಗಿದ್ದ ಏಕಾಂತ
ಸಂಗಾತಿಯ ಸ್ಮೃತಿಯ ಸೆರೆಯಲ್ಲಿ ಎದ್ದು
ಎತ್ತೆತ್ತಲೋ ಹುಡುಕಿದೆ ಸುತ್ತಲಿಲ್ಲದ ಸುಪ್ತವನ್ನು
ಒಂದು ಹೆಜ್ಜೆ ಹಿಂದೆಯೂ ಒಂದು ನಡೆ ಮುಂದೆಯೂ
ಹಾದಿ ಯಾವುದಾದರೇನಂತೆ ಈ ಹೃದಯಕೆ
ಬಾಡಿದ ಹೂವಿನಿಂದ ಸೌರಭವಿಲ್ಲವೆಂಬಂತೆ

ಸನಿಹದಲ್ಲಿ ಕಾಡುತಿಹುದು ಅರಿಯಲಾಗದ ವಿರಹ
ಉತ್ತರಗಳ ಉತ್ತರದಲ್ಲೂ ಪ್ರಶ್ನೆಗಳದೇ ಸಮರ
ಬಿಡಿಸಲು ಇಲ್ಲವಲ್ಲ ಯಾವ ಕಗ್ಗಂಟು
ಮೌನಕ್ಕೂ ಕಿವುಡಿಗೂ ಬಗೆಹರಿಯದ ನಂಟು
ಹೊಸ ದಾರಿಯಲ್ಲಿ ಧೂಳೆಬ್ಬಿಸಲೇ ಎಂಬಂತೆ
ಸಾಗಿ ಹೋಯಿತೊಮ್ಮೆ ನೆನಪುಗಳ ತೇರು

ಮತ್ತೊಮ್ಮೆ ಬಾರದಿರಲಿ ಒಲವಿನ ಮಳೆ
ಅದ ತಾಳುವಷ್ಟು ಶಕ್ತಳಲ್ಲ ಮೃದು ಇಳೆ
ಹನಿಗಳಾಗಿ ತೊಟ್ಟಿಕ್ಕಲಿ ಮಾತ್ರವೇ ಆದರೆ
ಸುರಿದು ಮೈ ಮನಗಳ ತೊಳೆಯುವುದ ನಾನೊಲ್ಲೆ
ಒಣಗಿಕೊಂಡೆ ಇರಲಿ ಒಳಗಿನ ಒಲೆ
ಹಸಿಯಾಗಿ ಹೊತ್ತಿಕೊಳ್ಳದಿರಲಿ ಹೊರಗಿನ ಹಾಳೆ


No comments:

Post a Comment