Thursday, 24 July 2014

ಡೈರಿ ಪುಟ - ೪೪


                ನಾನು ಆಗ ತಾನೇ ರೂಮಿನ ಕಸ ಗುಡಿಸಿ ಸ್ನಾನಕ್ಕೆ ಹೋಗಲು ತಯಾರಿ ನಡೆಸಿದ್ದೆ. ಬಡಬಡ ಬಾಗಿಲು ಬಡಿದ ಸದ್ದು. ‘ಇದ್ಯಾರಪ್ಪಾ ಈ ಥರ ಬಡಿತಾ ಇರೋರು’ ಅಂತಾ ನಾನು ಬಾಗಿಲು ತೆರೆದರೆ ಏನಾಶ್ಚರ್ಯ.!!! "ಹಾಯ್....." ಅಂತಾ ಇಡೀ ಕಾರಿಡಾರ್‍ ಗೆ ಕೇಳುವಷ್ಟು ಜೋರಾಗಿ ಕೂಗುತ್ತಾ ಒಳಗೆ ಬಂದಳು ನನ್ನ ರೂಮ್ ಮೇಟ್ ಮಹಾರಾಣಿ.
                    ಯಾವಾಗಲೋ ಕಾಲೇಜು ರೀಒಪನ್ ಆಗಿ ಮೂರು-ನಾಲ್ಕು ದಿನಗಳ ನಂತರ ಬರುವವಳು ಈ ಸಲ ಯಾಕೆ ಇಷ್ಟು ಬೇಗ ಅವತರಿಸಿದಳು ಎಂದು ನನಗೆ ಅಚ್ಚರಿ. "ಕಾಲೇಜು ಶುರುವಾಗಲಿಕ್ಕೆ ಇನ್ನು ಒಂದು ವಾರ ಇದೆ ಕಣೇ. ಕನ್ ಫ್ಯೂಸ್ ಮಾಡ್ಕೊಂಡು ಹೊರಟು ಬಂದೆಯೋ ಹೇಗೆ..?? ಮತ್ತೆ ಕ್ಯಾಂಪಸ್ ಕ್ಲೀನ್ ಮಾಡೋ ಕೆಲ್ಸಾ ಏನಾದ್ರು ನಿಂದೇನಾ..??" ನಾನು ಪ್ರಶ್ನಿಸಿದೆ. ಅವಳು ಮುಖ ಊದಿಸಿಕೊಂಡಳು.
                     "ನಿಂಗೆಲ್ಲಾ ಬರೀ ಇಂಥ ಯಡವಟ್ಟು ಆಲೋಚನೆಗಳೇ ಬರೋದು ಮಾರಾಯ್ತಿ. ಮನೇಲಿ ಕೂತು ಬೇಜಾರಾಯ್ತು ಕಣೇ. ಅಲ್ಲಿ ಎಲ್ಲಾರಿಗೂ ಸ್ಕೂಲ್, ಕಾಲೇಜ್. ಬಿಎಸ್ಸಿ, ಬಿಕಾಮ್ ಓದಿದೋರೆಲ್ಲಾ ಜಾಬ್, ಮಾಸ್ಟರ್ ಡಿಗ್ರೀ ಅಂತಾ ಬ್ಯುಸಿ ಇದಾರೆ. ಜೊತೆಗೆ ಈಗೀಗಾ ಮಳೆ ಬೇರೆ ಚೆನ್ನಾಗಿ ಬೀಳ್ತಾ ಇದೆ. ಎಲ್ಲೂ ಹೋಗೋ ಹಾಗೆ ಇಲ್ಲ. ಮಲಗೋದು, ತಿಂಡಿ ತಿನ್ನೋದು, ಟಿವಿ ನೋಡೋದು - ಇವಿಷ್ಟನ್ನೇ ಮಾಡಿ ಮಾಡಿ ಬೋರಾಯ್ತು. ಅದೂ ಅಲ್ದೇ, ಈ ವರ್ಷ ನಮ್ದು ಫೈನಲ್ ಅಲ್ವಾ..?? ಇದೊಂದು ವರ್ಷದ ನಂತ್ರ ಮತ್ತೆ ಭೇಟಿ ಆಗ್ತೀವೋ ಇಲ್ವೋ. ಸೋ, ಫ್ರೆಂಡ್ಸ್ ಜೊತೆ ಜಾಸ್ತಿ ಟೈಮ್ ಕಳೆಯೋಣ ಅನ್ನಿಸ್ತು. ಹೊರಟು ಬಂದೆ."
                    "ನೀ ಹೇಳಿದ್ದು ನಿಜ. ತುಂಬಾ ಜನ ಫ್ರೆಂಡ್ಸ್ ಜೊತೆ ದಿನ ಕಳೆಯೋಣ ಅಂತಾನೇ ಬೇಗ ಬಂದಿದಾರೆ. ಇನ್ನೊಂದು ವರ್ಷ ಅಂತ ಅಂದ್ಕೊಂಡ್ರು ದಿನಗಳೆಲ್ಲಾ ಕ್ಷಣಗಳ ಹಾಗೆ ಕಳೆದು ಹೋಗತ್ವೆ. ಆಮೇಲೆ ಬೇಕು ಅಂದ್ರೂ ಕಾಲೇಜು ದಿನಗಳು ವಾಪಸ್ಸು ಸಿಗಲ್ಲಾ."
                   "ಈಗ್ಲೇ ಇಷ್ಟು ಫೀಲ್ ಮಾಡ್ಕೊಳೋದು ಬೇಡಾ ಬಿಡು. ನಂಗೆ ತಿನ್ನಲಿಕ್ಕೆ ಏನಾದ್ರು ಕೊಡು ಮಾರಾಯ್ತಿ. ಸುಸ್ತಾಗಿ ಹಸಿವಾಗಿದೆ."
                       "ಅಲ್ಲಿ ಕಬೋರ್ಡ್ ಮೇಲಿನ ಡಬ್ಬಿಲಿ ಇದೆ ತಗೊ. ನಾನು ಸ್ನಾನ ಮುಗಿಸಿ ಬರ್ತೀನಿ. ಮಾತಾಡ್ಲಿಕ್ಕೆ ಭಾಳ ವಿಷಯಗಳಿವೆ." ನಾನು ಟವೆಲ್ ಹಿಡಿದು ಬಾತ್ ರೂಮ್ ಕಡೆ ಹೆಜ್ಜೆ ಹಾಕುತ್ತಾ ಹೇಳಿದೆ.


No comments:

Post a Comment