Wednesday, 9 July 2014

ಆತ ಬಂದಿದ್ದ


ಆತ ಮತ್ತೆ ಬಂದಿದ್ದ
ಬೆಚ್ಚಗೆ ಹೊದ್ದು
ನಾನು ಮುಚ್ಚಟೆ ಮಲಗಿದ್ದಾಗ
ಗುಮ್ಮನಂತೆ ಸುಮ್ಮನೆ ಬಂದ
ಕನಸುಗಳಿಗೆ ಕಚಗುಳಿಯಿಟ್ಟು
ಮನಸನ್ನೇ ಮುದ್ದಾಡಿ ಹೋಗುವಂತೆ
ನೀಲಿ ಕಂಗಳ ಹುಡುಗ
ಮೊನ್ನೆ ಮತ್ತೆ ಬಂದಿದ್ದ

ತಂಪಾದ ಗಾಳಿಯಲ್ಲಿ
ಪರಿಚಿತ ಕಂಪು ಸೋಕಿದಾಗ
ಚುಮುಚುಮು ಚಳಿಯಲ್ಲೂ
ಮೈ ಬಿಸಿಯಾಗಿತ್ತು
ಸಿಹಿಯಾದ ನಿದ್ದೆಯ ಮಧ್ಯದಲ್ಲೂ
ಪೆದ್ದು ಯೋಚನೆಗಳು ಕಾಡಿದ್ದವು
ಅದ್ಯಾವಾಗಲೋ ನನಗರಿವಿಲ್ಲದಂತೆ
ಹತ್ತು ಬಾರಿ ಮಗ್ಗುಲು ಬದಲಾಗಿತ್ತು

ಆತ ಬರುವ ಬಗ್ಗೆ ಸುಳಿವಿತ್ತೇ..??
ಹೊದಿಕೆಯೊಳಗೇ ಉತ್ತರ ಹುಡುಕಿದೆ
ಚಾದರದ ಚಿತ್ತಾರಗಳಲ್ಲೆಲ್ಲೋ
ಕಳೆದು ಹೋಗಿರಬೇಕು, ದೊರಕಲಿಲ್ಲ
ಕ್ಷಣ ಕೂಡ ಕಳೆಯುವ ಮುನ್ನವೇ
ಆತ ನನ್ನೆದುರಲ್ಲಿ ಕುಳಿತಿದ್ದ
ನೀಲಿ ಕಂಗಳ ಹುಡುಗ
ಕಣ್ಣಲ್ಲೇ ಕಥೆ ಹೇಳುವಂತಿದ್ದ

"ಈಗೇಕೆ ಬಂದೆ?" ನನ್ನ ಪ್ರಶ್ನೆ
ಪದಗಳಾಗುವ ಶಾಸ್ತ್ರಕ್ಕೊಳಪಡದೆ
ತುಟಿಯಂಚಿನ ನಗುವಿನಲ್ಲೇ ಮೂಡಿತ್ತು
ಆತ ಮಾತನಾಡಲಿಲ್ಲ, ಕಣ್ಣು ಮಿಟುಕಿಸಿದ
ಹಾಗೆಯೇ ನಸುಕಿನ ಬೆಳಕಲ್ಲಿ
ನಡೆದು ಸಾಗಿ ಹೋದ
ಉತ್ತರ ದೊರಕಿತೆಂಬ ತೃಪ್ತಿಯಲ್ಲಿ
ನಾನು ಮುಸುಕೆಳೆದುಕೊಂಡೆ


7 comments:

  1. ಚನ್ನಗಿದೆ ಲಹರಿ.. ಹೀಗೆ ಬರೆಯುತ್ತಲೇ ಇರಿ..

    ReplyDelete
  2. Nice Dream :-) Bahushya Munde baruva Hudugana Munsuchaneyo ............ :-) Athava Ello kanda Nili Kangala Hudagana Savi Nenapeno......... :-)

    ReplyDelete