Wednesday, 16 July 2014

ಕಣ್ ಪನಿ


ಮುಖವನ್ನು ಮಾತ್ರವಲ್ಲ
ಎದೆಯನ್ನೂ ತೋಯಿಸಿತ್ತು
ಹಿಂಗಾಲಿನ ತುದಿಯಲ್ಲೂ
ಹನಿಯ ಬಿಂದುಗಳು ಮೂಡಿತ್ತು
ಮಳೆಯೂ ಕ್ಷಣ ನಿಂತು ನೋಡುವಂತೆ
ಒಡಲೊಳಗೆ ಗುಡುಗು ಸಿಡಿಲು
ಬೆಳಕು ಇಲ್ಲದಿದ್ದರೂ ಮಿಂಚು

ಕಪ್ಪುಗಟ್ಟಿದ್ದ ಭಾವಗಳಷ್ಟೆ ಅಲ್ಲ
ಕಾಮನಬಿಲ್ಲಿನ ಬಣ್ಣಗಳೂ ಸಹ
ಧಾರೆಧಾರೆಯಾಗಿ ಹರಿದವು
ಮೊಂಡು ಹಠ ಮಾಡುತ್ತ
ಕೆಲವು ಹೆಪ್ಪುಗಟ್ಟಿ ಸೆಟೆದವು
ಅತ್ತ ಜಾರದಂತೆ ಇತ್ತ ಕೂರದಂತೆ
ಅಂಟಿಕೊಂಡು ಅಪರಂಜಿಗಳಾದವು

ತೇಲುತ್ತಿದ್ದ ಕಾಗದದ ದೋಣಿಗಳಿಗೆ
ನಿನ್ನೆಯ ಹುಟ್ಟು ಜೊತೆಯಾಗಿತ್ತು
ಸೂರ್ಯ ಕಾಣುವ ಮೊದಲೇ
ತಳ ಕಂಡ ನೌಕೆಗಳೆಷ್ಟೋ ನೂರು
ಹರಿತಕ್ಕೆ ಸಿಕ್ಕು ಕೊಚ್ಚಿಹೋದುವಲ್ಲ
ತಡೆ ಹಾಕುವವರಿಲ್ಲದೇ ಎಲ್ಲವೂ

ಬಿಡುವಿಲ್ಲದೇ ಹರಿದಿದೆ, ಹರಿಯುತ್ತಿದೆ
ಅರ್ಥವಿಲ್ಲದ ಅಶ್ರುವಿಗೂ ಅಭಿಮಾನ
ಹಂಗಿಲ್ಲದ ಹನಿಗಳಿನ್ನೂ ಹಸಿಯಾಗಿಯೇ
ಹೊಸ ಗಾಳಿಗಾಗಿ ಕಾದು ಕೂತಿವೆ
ಕಲೆಯಿಲ್ಲದಂತೆ ಹೆಜ್ಜೆಗಳನ್ನು ಅಳಿಸಿ
ಮತ್ತೊಂದು ಹರಿವಿಗೆ ದಾರಿಯಾಗಬೇಕು


1 comment:

  1. Very beautiful lines...matured writing...super like:)

    ReplyDelete