Friday, 6 June 2014

ಮತ್ತೊಮ್ಮೆ ಮಗುವಾಗಬೇಕಿದೆ


ಮತ್ತೊಮ್ಮೆ ಹುಟ್ಟಬೇಕೆನಿಸಿದೆ ಕಂದಮ್ಮನಾಗಿ
ಕೈಕಾಲು ಆಡಿಸುತ್ತ ಪಿಳಿ ಪಿಳಿ ನೋಡುತ್ತ
ಬೊಚ್ಚು ಬಾಯಿ ಅರಳಿಸಿ ನಗಬೇಕಿದೆ
ತೊದಲು ಮಾತಿನಲ್ಲಿ ಎಲ್ಲರನೂ ನಗಿಸುತ್ತ
ಅಂಬೆಗಾಲಿಕ್ಕುತ ಎಲ್ಲ ಕಡೆ ಸವಾರಿ ಗೈಯ್ಯುತ್ತ
ಮನೆಯಲ್ಲಿ ಮನಸಲ್ಲಿ ನೆಲೆಗೊಳ್ಳಬೇಕಿದೆ


ಅಮ್ಮನ ಕೈತುತ್ತನ್ನು ತಿಂದು ತೇಗಬೇಕಿದೆ
ಅವಳ ಮಡಿಲಲ್ಲಿ ಮಲಗಿ ಜೋಗುಳವ ಕೇಳಬೇಕು
ಅಪ್ಪನಿಂದ ಬಾರುಕೋಲಿನ ಪೆಟ್ಟು ತಿನ್ನಬೇಕು
ಅಜ್ಜನ ದೊಣ್ಣೆಯನ್ನು ಕುದುರೆ ಮಾಡಬೇಕಿದೆ
ಅಜ್ಜಿಯ ಕಥೆಗಳಲ್ಲಿ ನಾ ಕಳೆದುಹೋಗಬೇಕಿದೆ
ಮತ್ತೊಮ್ಮೆ ಆ ಮುಗ್ಧತೆಯನ್ನು ಸವಿಯಬೇಕಿದೆ



ಪಾಟಿ ಕಡ್ಡಿ ಹಿಡಿದು ಅ ಆ ಇ ಈ ಬರೆಯಬೇಕು
ಚೀಲ ಹೊತ್ತು ಶಾಲೆಯ ಕಡೆ ಸಾಗಬೇಕು
ಸ್ನೇಹಿತರೊಂದಿಗೆ ಕಣ್ಣಾಮುಚ್ಚಾಲೆ ಆಡಬೇಕಿದೆ
ಬೆಟ್ಟ ಗುಡ್ಡಗಳ ತಿರುಗಿ ಹೂವು ಹಣ್ಣು ಕೊಯ್ಯಬೇಕು
ಮಾವಿನಕಾಯಿ ಕದ್ದು ಬೇಲಿ ಹಾರಿ ಓಡಬೇಕು
ಮರಕೋತಿ ಆಡುವಾಗ ಬಿದ್ದು ಗಾಯ ಮಾಡಿಕೊಳ್ಳಬೇಕು


ಆಲೋಚನೆಗಳು ಅರಳಿರದ ಭಾವನೆಗಳು ಬಲಿತಿರದ
ಬಾಲ್ಯವದು ಜೀವನದ ಅತಿ ಸುಂದರ ಕಾವ್ಯ
ಹೊಳಪು ಕಣ್ಣುಗಳಿಂದ ಸುತ್ತಲೂ ಬೆಳಕನ್ನೇ ಕಾಣುತ
ಸ್ವಚ್ಛಂದ ಚಿತ್ತದೊಂದಿಗೆ ನಲಿದಾಡುವ ಕವಿತೆ
ಇಪ್ಪತ್ತರ ಈ ಬದುಕು ಸಾಕಾಗಿಹೋಗಿದೆ
ಮತ್ತೊಮ್ಮೆ ನಾನು ಮಗುವಾಗಿ ಹೆಜ್ಜೆಯಿಡಬೇಕಿದೆ


No comments:

Post a Comment