Friday, 16 May 2014

ಕುಸುರಿ


ಕುಂಚವನ್ನು ಕೈಯ್ಯಲ್ಲಿ ಹಿಡಿಯದೇ ಚಿತ್ರಿಸಲೇ..??
ಬಣ್ಣಗಳ ಸಿಂಚನಗಳ ಹನಿಯ ತಾಕಿಸದೇ
ಚಿತ್ತವು ಲಗಾಮಿಲ್ಲದ ಕುದುರೆಯನೇರಿ ಹೊರಟಾಗ
ಇನ್ನಾವುದರ ಹಂಗು ಬೇಕು ತನುವಿಗೆ
ಕಲ್ಪನೆಯ ಲೋಕದಲ್ಲಿ ತೇಲಾಡುವ ಸುಖ ಸಾಲದೇ..??

ಕಣ್ಣೆದುರಿಗೆ ಕಾಣುವ ಕೆತ್ತನೆಗಿಂತ
ಕಣ್ಣೊಳಗೆ ರೂಪ ತಳೆಯುವ ಕುಸುರಿಗೆ ಸಾಟಿ ಎಲ್ಲಿ..??
ಕಿವಿ ಕೇಳುವ ಮಾತುಗಳಿಗೆ ಮಿಗಿಲಾಗಿ
ಹೃದಯ ಬಡಿತದ ಮೌನ ಮಿಡಿತವು ಸಂಭಾಷಿಸದೇ..??
ಅಗೋಚರ ಕಲೆಯಲ್ಲಡಗಿದೆ ಅವ್ಯಕ್ತ ಅನುಭೂತಿ

ಮನಸ್ಸೆಂಬ ಮರಳಿನಲ್ಲಿ ಎಷ್ಟು ಚಿತ್ತಾರವ ಅರಳಿಸಲಿ..??
ನೂರು ಭಾವಗಳ ಸಾವಿರ ಹೆಜ್ಜೆಗಳನ್ನು ಮೂಡಿಸಲೇ..??
ಹರಳಿನ ಹೆರಳು ಹಿಡಿದು ಓರಣವಾಗಿ ಹೆಣೆಯಲೇ..??
ಕಾಲನ ಅಲೆಗಳು ಬಂದು ಅಳಿಸಿ ಹೋದರೇನಂತೆ
ನೆನಪುಗಳ ಗಾಳಿ ಅದನ್ನು ಸದಾ ಹಸಿಯಾಗಿಡುವುದು


No comments:

Post a Comment