Monday, 26 May 2014

ದ್ವೀಪ


ಅಲ್ಲಿ ಬೇರೆ ಯಾರಿಲ್ಲ ನಾನೊಬ್ಬಳೇ
ನನ್ನ ಮನಸನ್ನೂ ದೇಶಾಂತರ ಕಳಿಸಿಹೆ
ಕನಸುಗಳನ್ನೂ ಕಟ್ಟಿ ಹಾಕಿ ಮೂಲೆಗೆಸೆದಿಹೆ
ಉಸಿರು ಒಂದಿದೆ, ಜೊತೆಗೆ ಬಸಿರಿನ ಹಸಿವಿದೆ
ಹೆಜ್ಜೆಯಿಡಲು ಸಾಕಾಗುವಷ್ಟು ಕಸುವಿದೆ
ಬೇರೆ ಯಾರಿಲ್ಲ, ಅದು ನನ್ನದೇ ದ್ವೀಪ

ದಿನ ಬೆಳಗಾಗುತ್ತದೆ ಸೂರ್ಯನ ಕಿರಣಗಳಿಗೆ
ಹಕ್ಕಿಗಳ ಇಂಚರವು ನನ್ನನ್ನು ಎಬ್ಬಿಸುತ್ತದೆ
ಹಸಿರಿನ ಸೆರಗು ನನ್ನ ಮೈ ಮನ ತೊಳೆಯುತ್ತದೆ
ಹರಿಯುವ ನೀರು ಜೀವಂತಿಕೆಯ ಹುಟ್ಟಿಸಿ
ಬೀಸುವ ಗಾಳಿ ಬೇಗುದಿಯನ್ನು ಹೋಗಲಾಡಿಸಿ
ನನ್ನನ್ನು ಮುನ್ನಡೆಯಲು ಪ್ರೇರೇಪಿಸುತ್ತವೆ

ಮಾತುಗಳ ಮೇರೆ ಇಲ್ಲ, ಮೌನದ್ದೇ ರಾಜ್ಯಭಾರ
ಭಾವಗಳ ಬೇಲಿಯಿಲ್ಲ, ನಿರ್ಲಿಪ್ತತೆಯೇ ಅಲಂಕಾರ
ಅವಮಾನ, ಅಭಿಮಾನಗಳೆಲ್ಲವೂ ಸಮಾನ ಆಭರಣ
ಚಿತ್ತದಲ್ಲಿ ಮನೆಮಾಡಿಹ ಶಾಂತತೆಯೇ ಭೂಷಣ
ಆಳಕ್ಕೆ ಇಳಿಯಬೇಕು ಇನ್ನೂ ಹೆಚ್ಚು
ನನಗೆ ಇದೊಂದು ತೀರದ ಹುಚ್ಚು

ಕೊನೆಯಿಲ್ಲದ ಏಕಾಂತವೇ ನನ್ನ ಅಧಿಪತಿ
ಅಲ್ಲಿಹುದು ಯೋಚನೆ, ಯೋಜನೆಗಳ ಬುತ್ತಿ
ಕಾರ್ಯ ಕೆಲಸವೊಂದೇ ಅರ್ಥಸಹಿತ ವೃತ್ತಿ
ಎಲ್ಲರೊಳಗೊಂದಾಗಿ ಬದುಕುವ ಪರಿಹಾಸ್ಯಕ್ಕಿಂತ
ಹೊರ ಬಂದು ಬಾಳುವ ಸಾಹಸವೇ ಮೇಲು
ಅದಕ್ಕೆ ನಾನೊಬ್ಬಳೇ ಅಲ್ಲಿ, ನನ್ನ ದ್ವೀಪದಲ್ಲಿ


No comments:

Post a Comment