Sunday, 25 May 2014

ಆಲಾಪನೆ


ಅದು ಕೇವಲ ದನಿಯ ಹನಿಯೋ
ಅಲೆಗಳ ತೆರೆಮರೆಯಲ್ಲಿ ಮೂಡಿದ ಸ್ವರವೋ
ಸುಳಿಸುಳಿಯಾಗಿ ರಾಗ ಹೊಮ್ಮಿಸುತ್ತಾ ಮೇಲೆದ್ದು
ಉತ್ತುಂಗದ ಶಿಖರವ ಮೆಟ್ಟಿ ನಿಲ್ಲುವಂತೆ ಹೊರಟರೂ
ಕೊನೆಗೆ ಮಂದ್ರದ ಮನೆಯಲ್ಲಿ ಮೂಕ ಮೌನ
ಪದ್ಯವಾಗಿ ಹೊರಗೆ ಬರುವುದೇ ಇಲ್ಲ
ಗರ್ಭದಲ್ಲಿನ ಆಲಾಪನೆಯೇ ಎಲ್ಲ

ಒಮ್ಮೆ ಆಲಿಸಿ ಹಾಗೆಯೇ ಮರೆತುಬಿಡಲೇ..??
ರಾಗ ತಾಳಗಳಿಗೆ ಪದಗಳ ಜೋಡಿಸಿ ಹಾಡಿಬಿಡಲೇ..??
ಜಾಡು ಹಿಡಿದು ಹೊರಟರೆ ಇಳಿಯುವುದೊಂದೇ
ಆಳಕ್ಕೆ, ತಳವೇ ಇಲ್ಲದಂತೆ ಮತ್ತೂ ಆಳಕ್ಕೆ
ಸ್ವರ ಹೊರಡಿಸುವ ಮುನ್ನವೇ ಕ್ಷೀಣ
ತಂತಿ ಹರಿದ ತಂಬೂರಿಯ ಮೀಟಿದಂತೆ
ಮತ್ತೆ ವ್ಯರ್ಥ ಆಲಾಪನೆಯೇ ಎಲ್ಲ

ಇದೇತಕ್ಕೆ ಹುಚ್ಚು ಹಂಬಲ ಮನಕೆ..??
ಏನೆನ್ನಲ್ಲಿ ಮಗುವಿನಂತೆ ರಚ್ಚೆ ಹಿಡಿಯುವ ಗುಣಕೆ..??
ಶ್ರುತಿಯನ್ನೇ ಹಿಡಿಯಲಾರೆನೆನ್ನುವ ಕೊರಳಿನ ಸುತ್ತ
ನಾದ ಮಾಧುರ್ಯದ ಉರುಳು ಬಿಗಿಯುವ ತಮಾಷೆ
ಉಸಿರು ಬಿಗಿದರೂ ದನಿ ಎತ್ತಿ ಹಾಡುವ ಬಯಕೆ
ಕೊನೆಗೂ ಹೊಮ್ಮಲಾರದು ಸ್ವರವು ಒಡಲೊಳಗಿಂದ
ಮತ್ತೆ ಅದೇ ಹಳೆಯ ಆಲಾಪನೆಯೇ ಎಲ್ಲ


1 comment:

  1. Really good one... so true the lines in 1st para are ...

    ReplyDelete