Tuesday, 15 April 2014

ಕಪ್ಪು-ಬಿಳುಪು


ಮತ್ತದೇ ಏಕಾಂತದ ಸ್ನೇಹ
ಕೊಂಚ ದೂರ ಜೊತೆಯಾಗಿ
ಹೆಜ್ಜೆ ಹಾಕುತ್ತ ಸಾಗಿದೆ ಪಯಣ
ಮೌನವೇ ಮಾತಾಗುವ
ಭಾವಗಳೇ ಕತೆಯಾಗುವ
ರಂಗು ರಂಗಿನ ಚಿತ್ರಣ

ಮನದ ಅದೇ ಬೀದಿಯಲ್ಲಿ
ಹಳೇ ನೆನಪುಗಳ ರಥದಲ್ಲಿ
ಹೊಸ ಕನಸುಗಳ ಸವಾರಿ
ಅತ್ತ ಕಡೆ ಗಾಢ ಕಪ್ಪು
ಇತ್ತ ಕಡೆ ತಿಳಿ ಬಿಳುಪು
ಯಾರು ಇದಕ್ಕೆಲ್ಲ ರೂವಾರಿ

ಮುಂಜಾನೆ ತಿಳಿಬಿಸಿಲು
ಅಪರಾಹ್ನ ಮೋಡದ ಮಬ್ಬು
ಸಂಧ್ಯೆಗೆ ವರ್ಷಧಾರೆಯ ಸಿಂಚನ
ಲಹರಿಯ ಗತಿಗೆ ತಕ್ಕಂತೆ
ಮಿಡಿಯುವ ಹೃದಯದಲ್ಲಿ
ಯಾವುದೀ ತಿಳಿಯದ ಕಂಪನ

ಕತ್ತಲ ಕರಿ ಕಪ್ಪಿನಲ್ಲಿ
ಕಾಣದಂತೆ ಕಳೆದುಹೋಗುವಾಗ
ಮೂಡಿದಂತಿದೆ ಬೆಳ್ಳಿಯ ಬೆಳಕು
ಅರಿವಾದಾಗ ಈ ಸತ್ಯ
ಏಕಾಂತದ ಸಾಂಗತ್ಯದಲ್ಲಿ
ಬಿಚ್ಚಿಕೊಂಡಿದೆ ಆನಂದದ ಸರಕು


No comments:

Post a Comment