Sunday, 23 February 2014

ಮತ್ತೆ ಹುಟ್ಟಿ ಬಾ ಗೆಳೆಯ



ಈ ದಿನದ ಬೆಳಗಿನಲ್ಲಿ ಬೆಳಕಿಲ್ಲ
ಹಕ್ಕಿಗಳ ಕಲರವವಿಲ್ಲ, ಹೂವುಗಳ ಪರಿಮಳವಿಲ್ಲ
ನೀನಿಲ್ಲದ ಪ್ರಕೃತಿಯಲ್ಲೂ ‘ಸ್ಪಂದನ’ವಿಲ್ಲ
ನಿಲ್ಲದ ಹಸಿ ಕಣ್ಣೀರಿನ ಯಾನ
ಎದೆಯಾಳದಲ್ಲಿ ಶೃತಿಯಿಲ್ಲದ ಗಾನ
ಎತ್ತಲೂ ಅಳುತಿದೆ ಸ್ಮಶಾನ ಮೌನ

ನಿನಗೆ ಮನಸ್ಸಾದರೂ ಬಂತು ಹೇಗೆ
ನಮ್ಮನ್ನೆಲ್ಲ ಬಿಟ್ಟು ಹೋಗಲು ಹಾಗೆ
ನಾವಿಲ್ಲಿ ಜೀವಛ್ಚವವಾಗಿರುವೆವು ಹೀಗೆ
ನಿನ್ನ ನಗು ನಮ್ಮನ್ನು ಅಳಿಸುತಿದೆ
ನಿನ್ನ ಮಾತು ನಮ್ಮನ್ನೆಲ್ಲ ಮೂಕವಾಗಿಸಿದೆ
ಈ ಪುಟ್ಟ ಹೃದಯವು ಬಡಿತವನು ನಿಲ್ಲಿಸಿದೆ

ನೀ ಹೋದರೇನು ನಮ್ಮಿಂದ ದೂರ
ನಿನ್ನ ನೆನಪುಗಳು ಆಗಸಕ್ಕಿಂತಲೂ ಎತ್ತರ
ಭಾಸವಾಗುತಿದೆ ನೀನಿರುವೆ ಇಲ್ಲೇ ಹತ್ತಿರ
ಗೆಳೆಯಾ, ಮೇಲಿಂದಲೇ ನಗುತಿರು ನಮಗಾಗಿ
ನೀ ಮತ್ತೆ ಹುಟ್ಟಿ ಬಾ ಮಗುವಾಗಿ
ನಮ್ಮೆಲ್ಲರ ಮನಸಿನ ಹೊಸ ಕನಸುಗಳಾಗಿ


1 comment: