Friday, 13 December 2013

ಕಣ್ಣಹನಿ

ಓ ಮಳೆಯೇ,
ಒಮ್ಮೆ ಅಬ್ಬರಿಸಿ ಸುರಿದುಬಿಡು ನನಗಾಗಿ
ಒರೆಸು ಬಾ ಈ ಕಣ್ಣಹನಿಗಳನ್ನು
ಹೊರಟುಹೋದ ನನ್ನ ಇನಿಯ
ನಾನಿತ್ತ ಒಲವಿನ ಕಾಣಿಕೆಗೆ ಪ್ರತಿಯಾಗಿ
ಕಣ್ಣಹನಿಗಳ ಉಡುಗೊರೆಯನಿತ್ತು
ಒರೆಸುವ ಕೈಗಳಿಲ್ಲದೇ ಜಾರುತ್ತಿವೆ ಹನಿಗಳು
ಬತ್ತಿಹೋಗದ ಜೀವಸೆಲೆಯಂತೆ




ಕರಗಿಹೋಗಲಿ ನನ್ನ ಬಿಸಿ ಕಣ್ಣೀರು
ನಿನ್ನ ತಂಪಾದ ಹನಿಗಳೊಡನೆ ಸೇರಿ
ಹರಿದು ಸಾಗಲಿ ಹಳ್ಳಕೊಳ್ಳಗಳ ನಡುವೆ
ನದಿ ಸರೋವರಗಳ ಜೊತೆ ಓಡಲಿ
ಕಲ್ಲುಬಂಡೆಗಳ ತೋಯಿಸಿ ಹರಿಯಲಿ
ಹಸಿ ಮಣ್ಣಿನ ಗಂಧವನ್ನು ಹೀರಲಿ
ನೊಂದ ಜೀವಗಳ ಕೊಳೆಯನ್ನು ತೊಳೆಯುತ್ತ
ನೋವಿನ ಕಹಿಯನ್ನು ಹೊತ್ತು ಹರಿಯಲಿ

ಇಳಿದು ಬಾ ನೀ ವರ್ಷಧಾರೆ
ಬೆರಳುಗಳಾಗಿ ನನ್ನ ಕಣ್ಣಹನಿ ಒರೆಸು
ಅಶ್ರುಧಾರೆಯ ಪ್ರವಾಹದಲ್ಲಿ ತೊಯ್ದು
ತೊಪ್ಪೆಯಂತಾಗಿಹ ಹಸಿ ಮನಕ್ಕೆ
ಹೊಸಬಿಂದುಗಳ ಸಿಂಚನವ ನೀಡು ಬಾ
ಗೆಳೆಯನ ನೆನಪುಗಳ ಬಿಸಿಲಲ್ಲಿ ಅಲೆದಾಡಿ
ಬಸವಳಿದಿಹ ಈ ಹೃದಯಕ್ಕೆ
ಸಾಂತ್ವನದ ನೆರಳು ನೀನಾಗು ಬಾ


1 comment: