Thursday, 12 December 2013

ಮುಖವಾಡ

             
ಅಲ್ಲಿ ಇಲ್ಲಿ ಎಲ್ಲೆಂದರಲ್ಲಿ ಎತ್ತಲೂ
ಅಂದು ಇಂದು ಯಾವಾಗಲೂ
ಜಗತ್ತು ಮಲಗಿದೆ ರಂಗಮಂಚವಾಗಿ
ಬಣ್ಣ ತಳೆದು ನಿಂತಿದ್ದಾರೆ ಜನರೆಲ್ಲರೂ
ಅವನು ಮಾತ್ರವಲ್ಲ, ಅವಳೂ ಸಹ
ಎಲ್ಲರ ಜೊತೆ ಸೇರಿ ಅವರೂ ಸಹ

ಹತ್ತರೊಳಗೆ ಹನ್ನೊಂದನೆಯವರಾಗಿ
ಸಾವಿರದಲ್ಲಿ ನೂರಾ ಒಂದನೆಯವರಾಗಿ
ಕುಣಿಯುತ್ತಿದ್ದಾರೆ ಇನ್ನೊಬ್ಬರನ್ನೂ ಕುಣಿಸುತ್ತ
ಅಂಕಕ್ಕೆ ತಕ್ಕಂತೆ ನಟಿಸುತ್ತಿದ್ದಾರೆ
ಪರದೆ ಎಳೆದ ನಂತರವೂ ನಿಲ್ಲುವುದಿಲ್ಲ
ಸಾಗುತ್ತಿರುತ್ತದೆ ನಟನೆಯ ಜಾತ್ರೆ

ದೇಶ ಕಾಲಗಳ ಚಿಂತೆಯಿಲ್ಲ
ಸುತ್ತಮುತ್ತಲೇಕೆ ಎತ್ತಲಿನ ಪರಿವೆಯೂ ಇಲ್ಲ
ಪಾತ್ರದ ಕುರಿತಷ್ಟೇ ಕಾಳಜಿ
ತಮ್ಮ ಬಗ್ಗೆಯೂ ಇಲ್ಲ ಆದರ
ಪರ ಎನ್ನುವುದಂತೂ ಬೆಲೆ ಇಲ್ಲದ ವಸ್ತು
ಅಹಂನ ಹೊರತಾಗಿ ಬೇರೇನು ಗೊತ್ತು?

ನಾಟಕೀಯತೆಯ ಬಣ್ಣಗಳ ಹೊಳಪಲ್ಲಿ
ಮಾಯವಾಗಿದೆ ಭಾವುಕತೆಯ ಚಿತ್ತಾರ
ತೋರಿಕೆಯ ಮುಖವಾಡವ ತೊಟ್ಟು
ಮರೆಮಾಚುವರು ಮನದ ಸತ್ಯವನ್ನು
ಬೇಕಿಲ್ಲ ಸ್ವ ಎನ್ನುವ ತನ್ನತನ
ತಾಳಕ್ಕೆ ಕುಣಿಯುವುದೇ ಒಂದು ದೊಡ್ಡತನ





4 comments: